Prabu Parikesit

 Sanggit tentang prabu Parikesit wayang kulit jawa 

Swuh rep data pitana

Sineratan sesanti sirna ilang sukertaning bumi,  punika dadya palupi lamun watak asura nadyan kinayoman bathari pramuni yekti bakal kalindih dening watak sura ingkang mawi sarana luhuring budi miwah anteping pakarti.

Kadya lelampahan duk ing nguni nenggih prang suci Tegalkuru. Campuhing Barathayuda Jayabinangun kurawa klawan Pandhawa, tinengeran guguring para senopati. Ingkang den pungkasi babak rubuhan nenggih sirna prabu Kurupati. 

Purnaning Bratayudha dadya tetenger purnaning jaman purwa,gumanti lelampahan Maha Prastanika Parwa ingkang winastan jaman Karimataya. 

Minangka pambukaning kandha murwakani gancaring carita, bebasan ngupaya satus datan jangkep sedasa, muhung punika gumelaring negari Yamastina mengku werdi negari merdika ing pungkasaning Barathayuda.

Astina, krana duk kunane sang prabu Hastimurti inggih sang Hastipraba ingkang kepareng yasa negari. Gajah Oya, rumiyin tilas kedhatoning dirada Prabu Gajahsura ingkang kalindih prang klawan Prabu Palasara. Ugi winastan Liman Benawi sinung pratima dwipangga awasta Gajah Purbakayun. 

Lah sinten ta ingkang jumeneng wonten negari Yawastina, wenang den ucapna dasanamanira Sang Srinoranata jejuluk Prabu Parikesit ya prabu Paripurnama, Prabu Dwipayana, Prabu Mahabarata, Prabu Paripurna, Bimanyusiwi ya Prabu Utari Atmadja punika atmajane Dewi Utari.

Baca juga : Ramaparasu Mokswa

Pramila jejuluk Prabu Parikesit dadya pepenget lahire sang nata hanyarengi lumadining jaman Karimataya. Jejuluk Prabu Paripurna, mengku werdi lamun lahirira nyarengi paripurnaning Barathayuda Jayabinangun. Paripurna, sumorot wedonane yayah soroting sasadaro kang nedheng ndadari.

Pramila jejuluk Prabu Dwipayana, nunggak semi peparabe kang eyang Saptaarga.  Inggih jejuluk Bimanyusiwi sang nata yogane raden Abimanyu. 

Sang nata ngasta pusaraning praja linambaran catur wara nenggih dana dhenda, sama beda, hambage samahita danahita, sarahita twin darmahita.

Werdine sang nata sengsem marang ulah kasekten, remen ulah keprajuritan, nengenaken adil paramarta turta tansyah marsudi ing reh tatakrami. Lampahing pradata nindakaken dana wesi asah, lire datan hambau kapine. Dhenga kang nerak prenatan kapatrapan pidana. Kang agung lelabuhan ne pinaringan bebana ganjaran murwat klayan bobot lelabuhanira.