Jejer Kasatriyan Pringgodani

Wonten kilen winatesan tebaning wana gandasuli,wonten wetan winatesan kikis glagah tinunu,ering kidul nenggih kikis tunggarana,wondene sisih ler winatesan hadeging gunung sindoro.

Hanenggih punika tebaning wewengkon kasatrian Pringgodani. 

Rumiyen tilas kedhatoning yaksendra prabu Tremboko.  Pramila para kawula Priggondani racak bangsane denawa.

Puraya gung kedhaton Pringgodani awangun joglo, sedaya dumadi saking rajaning tosan. Saka guru wesi balitung, cor-coran sak pranggul gedene.Saking ngandhap menghayat minggah rinenggaukiran ceplok sekar plasa.

Blandar malang wesi mangangkang, pengeret wesi manggambal. Ander wesi pulosani pinasak wesi kuning,jejed wesi janus pinaku waja.Pepayu sirap tembaga sinangling, pinetha wuluning peksi garuda.

Baca juga : Candhi Bunggalan

 Wuwung selaka menur jinangkepan kancing pratima parunggusari pinetha peksi dhandhang,kang arsa lumayang.

Jerambah wreksa kestuba tinalasah kaca gedhah kang tanpa rasa.

Naratas prapteng talundhange cinandhi hanjog mring paningrat.Ngajengipun pendhapi sinung balumbung,tengahe pancoran toya tinepi banon. Jinangkepan pepasren pratima rukmi, pinetha peksi ratuwali kang lagya kurda mrewasa sawer.

Sumorot cahyane ponang pratisara harebut praba klayan sang pratanggapati. Hing bacira ngayun tinunu wreksa mandira jajar. Gapura kang kinarya plawanganing bacira saking sela sumayana,wiwarane pinetha menara. puncakira rinajeg warasta.

Kanan kirining gapura sinung reca sela kresna  angemba sang hywang gana.

Lha sinten ta ingkang hanyatriya wonten kasatrian Pringgodani wenang sinebat dasanamanira kekasih raden Gathutkaca, Gurundaya,Harimbiatmaja,inggih raden Purbaya.

Baca juga : Antasena dadi Ratu


Kapitan lumajang tengah, ya sang Bimasuta.Satriya gagah prakosa godheg wok simbarjaja. Rawis ketel pinalintir yayah sadak suruh temu rose. Sarunduning salira dumadi saking tosan pilihan babaraning empu ramadi ing kawah candhradimuka.

Otot kawat balung wesi, sungsum gegala,netra kumala,lidhah jingga saja selaka menur, brengos pamor,mustaka klonthongan wesi. Pundhak dhendhasuksara, lengen gada,sikut pethel,driji gunting, epek-epek cakra. Dada blebekan waja,pupu bindi,dengkul paron,gares linggis,dlamakan pacul.

Nuju hari anggara ing wanci tabuh nawa enjing, raden Gathutkaca miyos aning pendhapi. Lenggah dampar sinasotya,sesemek babut permadani pinulas ceplok sekar tanjung. Ingkang mungweng ngarsa caket denira seba,anenggih punika yaksa turahan Pringgodani atmajane prabu Tremboko  kekasih raden Kala bendana.

Nadyan wujud yaksa nangging kasinungan aji jaya kawijayan.Nenggih aji panggendam,pramila Kala bendana saged nggagapi kawontenan, lumantar hanggada swasana.Kaprenah bapa paman klayan dyan Gathutkaca, ingkang wiwit jabang tetuka sang kala bendana wus datan kena kapisahaken.

Kasambet praptanira kadhang nunggal yayah len rena nenggih satriya Jangkarbumi raden Hanantareja ingkang sarimbit klayan sang rayi raden Antasena.

Dereng ngantos imbal wacana katungka praptane satriya swarga dahana Bambang wisanggeni gumrojog tanpa larapan.  Kagyat sang Harya tetuka sigra hamapag kang rayi Wisanggeni. 

Mangkana aris pangandikane raden Gathutkaca kawiyosan lesan.