jejer negari Amarta

style="text-align: left;" trbidi="on"> Minangka gempalaning carita, anenggih punika ta warnanira negari Amarta inggih sinebat negari batanakawarsa.Pramila sinebat amarta mengku werdi dadya sasana pangasrepan inggih sasana panggesangan,labet saking yuwananing bumi tuwin kawibawaning nata ingkang ngasta pusaraning praja.Cintakapura negari mirah toya,kathah tlaga myang sendhang -sendhang kang duk kunane katelah sendhang cintaka,papan pangasrepan sekar pudhak ingkang aruming ganda nganti sak yojane adohe,kencakarupa mengku werdi kedhaton ingkang sinungging rerenyepan saking rajaning sesotya.Turta jumenenging nata sineratan srana sesaji rajasuya. Awasta indraprahasta mengku werdi kukuwunging sinung raharjaning sesama, sama samaning dumadi tinuntun tataning pradata saking para satriya ingkang mahambeg brahmana.pramila endahing pura yayah kahyangan kaendran batanakawarsa.punika dadya pepenget Lamun dumadining praja winangun sarana adrening cipta miwah sengkuting makarya ayahaning darma para satriya ingkang tulus jiwa ing utama.Puraya gung endah kang warna,wiwaraning pendhapi winangun joglo pinayu sesirapan saking wreksa kestuba.Sakaguru kayu cendhanasari tina retes rajaning sesotya miwah barleyan. Ukiran menghayat minggah pinetha lunging gadhung rumambat,ing nginggil cinakep ukup selaka menur. embane yayah sekar pudhak ingkang nedheng mekar.ompak geng sela kresna pinathik akik ginambaran peksi kathik.jerambah jejobinan tinalasah sela kaca. naratas prapteng talundhangan tinundha- tundha pinggire ginapit parungsari.panigrat narats dumugi pelataran sarwi blawera.pinggire pinager pacak suji awangun warastra ing bacira ngayun tinunu mandira seta jejer kalih. Sineratan mriyem sakembaran kyai guntur tuwin nyai mendhung. Hangregancang yayah prayitneng kewuh. Sinten ta ingkang jumeneng nata wonten negari Amarta, jejuluk prabu punthadewa, sadha dwijakangka,darmaputra,darmawangsa, inggih prabu yudhistira,sang anjathasatu,gunatalikrama,pritasuta,pandhutanaya.Narendra guna ing aguna tan ngendhak gunaning liyan,luhur datan ngungkuli andhap datan kasor ing sesami. Tulusing jiwa utama temah sang nata handarbeni mengsah,pramila katingal medika sugengira tan saged mbentenaken bingah tuwin susahing manah.karana ingadu ulat manis manuhara satemah sang nata katingal rahayu pinayungan karaharjan.luhuring asma wibawaning nata katingal saking dana ingkang lumintu.Negari amarta sinung karaharjan karana sang nata nggenya ngasta pusaraning praja linambaran paugeran caturwara,sama beda dana dhenda,adem parentahe ngresaksa gigire. Mengku cahya mbun mbunane. dedanane siang ratri hanggung lumintu yayah ilining toya narmada.paring boga wong kaluwen,paring sandang wong kawudan,paring obor wong kepetengan,maluyakaken wong nandhang sakit,paring toya wong kasatan.akarya suka kang nawang prihatin. nujuhari sajuga sang nata prabu punthadewa lenggah sinawaka munggweng dampar kencana, sesemek babut permadhani,sinebaran sari sari ginandha wida jebat kesturi.wiyosing sang nata kaha yap para abdi bedhaya srimpi tuwin biyada manggung ketanggung,jaka palara lara kang samya ngampil upacara keprabon, sirna kamanungsaning yayah bathara darma ngejawantah kahayap para hapsari. Sinten ta ingkang kepareng caket ngabyantara sang nata.Lah menika kadhang unggul pawenang sang panenggak pandawa katingal gagah birawa hangregancang pindha lintang bimasekti kekasih raden werkudara, bratasena,bimasena,wahyunindya,kusuma yudha inggih sang bilawa.kasambet sowanira sang penengah nenggih raden arjuna,ya dyan janaka.datan kantun pisowanane satriya kembar dyan nakula miwah sadewa saking sawajajar saha bumiretawu.dupi wus sawenga denira ngabyantara. prabu punthadewa nulya sung sasmita nenggih badhe rumentahing sabda, mengkana ririh sabdanira sang yudhistira ingkang kawiyosan lesan.
https://www.kuswantokhalif.blogspot.com